Հելսինկիի ԵԱՀԽ խորհրդի լրացուցիչ հանդիպում
24 մարտ, 1992թ.
Հետեւությունների ամփոփում
- Նախարարները արտահայտեցին իրենց խորը մտահոգությունը Լեռնային Ղարաբաղում եւ նրա շուրջ զինված հակամարտության շարունակվող ուժգնացումով, որի հետեւանքով բնակչության շրջանում ավելանում են տառապանքները եւ մարդկային զոհերի թիվը: Նրանք հակամարտության դադարեցման ուղիների եւ միջոցների վերաբերյալ անցկացրին լայն քննարկում` հիշատակելով տարածաշրջանային եւ միջազգային անվտանգությանն ուղղված այն հետեւանքները, որոնց կարող է բերել հակամարտության շարունակումը եւ հետագա ընդլայնումը: Նրանք բոլոր կողմերին հորդորեցին զսպվածություն ցուցաբերել:
- Նախարարները ամենավճռական կերպով կրկին կրակի անհապաղ եւ արդյունավետ դադարեցման կոչ արեցին` տեղերում պատասխանատու հրամանատարների ակտիվ մասնակցությամբ: Նրանք կոչով դիմեցին վստահության մթնոլորտի վերականգնման եւ կառուցողական երկխոսության պայմանների վերաբերյալ` ներառյալ տնտեսական եւ քաղաքական ճնշումների գործադրման դադարեցումը:
- … Նախարարները համաձայնեցին, որ ԵԱՀԽ-ն պետք է կարևոր դեր խաղա այդ հակամարտության խաղաղ գործընթացի զարգացման հարցում, եւ որ դրությունը Լեռնային Ղարաբաղում եւ նրա շուրջը ԵԱՀԽ-ից պահանջում է հետագա գործողություններ:
- Նախարարները ԵԱՀԽ նախարարների խորհրդի գործող նախագահ պարոն Իրժի Դինստբիրին հանձնարարեցին մոտակա ժամանակներում այցելել այդ շրջան` օժանդակելու, մասնավորապես, կրակի արդյունավետ դադարեցմանը եւ պահպանելուն, ինչպես նաև համապարփակ խաղաղ կարգավորման համար շրջանակի ձեւավորմանը:
- Նախարարներն արտահայտեցին իրենց վճռական համոզվածությունը, որ ԵԱՀԽ հովանու ներքո Լեռնային Ղարաբաղի հարցով խորհրդաժողովը բանակցությունների համար կապահովի մշտական ներկայացուցչական ժողով` ԵԱՀԽ սկզբունքների, պարտավորությունների եւ դրույթների հիմքով ճգնաժամը խաղաղ կարգավորելու նպատակով: Այս կապակցությամբ նախարարները ԵԱՀԽ նախարարների խորհրդի գործող նախագահին խնդրեցին որքան հնարավոր է շուտ գումարել նման խորհրդաժողով:
- Նախարարները, բացի այդ, համաձայնեցին, որ Մինսկում անցկացվելիք այդ խորհրդաժողովի մասնակիցներ են լինելու Ադրբեջանը, Հայաստանը, Բելառուսը, Գերմանիան, Իտալիան, Ռուսաստանի Դաշնությունը, Ամերիկայի Միացյալ Նահանգները, Թուրքիան, Ֆրանսիան, Չեխիայի եւ Սլովակիայի Դաշնային Հանրապետությունը, Շվեդիան: Լեռնային Ղարաբաղի ընտրված եւ այլ ներկայացուցիչները` որպես շահագրգիռ կողմ, հրավիրվելու են խորհրդաժողովին նրա նախագահի կողմից` խորհրդաժողովին մասնակից պետությունների հետ խորհրդակցություններից հետո: ԵԱՀԽ խորհրդի գործող նախագահը կնշանակի ԵԱՀԽ հովանու ներքո Լեռնային Ղարաբաղի հարցով խորհրդաժողովի նախագահին:
- Նախարարները հետեւողականորեն հորդորեցին ԵԱՀԽ բոլոր անդամ պետություններին եւ բոլոր շահագրգիռ կողմերին ձեռնարկել անհրաժեշտ բոլոր քայլերը` ապահովելու, որպեսզի մարդասիրական օգնություն տրամադրվի բոլորին, ով դրա կարիքն ունի` օգտագործելով արագ եւ արդյունավետ միջոցներ, ներառյալ միջազգային հսկողության տակ դրված անվտանգ միջանցքները:
11. Նախարարներն ի գիտություն ընդունեցին Հայաստանի եւ Ադրբեջանի պարտավորությունները` ցուցաբերել ամենայն աջակցություն ԵԱՀԽ խորհրդի գործող նախագահի` այդ տարածաշրջանում առաքելությանը, ինչպես նաև այլ գործողություններ, որոնց նկատմամբ ձեռք է բերվել ԵԱՀԽ խորհրդի համաձայնությունը, եւ հորդորում են երկու երկրներին ակտիվորեն կատարել այդ պարտավորությունը` կայուն եւ խաղաղ կարգավորման հասնելու նպատակով: