«Մեդիալաբի» գլխավոր խմբագիր Մարիաննա Գրիգորյանը երեկ ավելի քան երեք ժամ ցուցմունք է տվել Քննչական կոմիտեում և իրավապահներին միջնորդել է պաշտպանության տակ վերցնել իր ընտանիքին, «Ազատության» հետ զրույցում ասել է Գրիգորյանը։
Մարիաննա Գրիգորյանը նաև տեղեկացրել է, որ երեկվա դրությամբ, իր հասցեին սպառնալիքներ հղելու փաստով հարուցված քրեական գործի շրջանակում որևէ անձի մեղադրանք չի առաջադրվել։
Գիրգորյանի հետ հարցաքննությանը մասնակցել է նաև իրավապաշտպան Արթուր Սաքունցը։ Նա «Ազատության» հետ զրույցում ասել է, որ քննիչը դեռ որոշում չի կայացրել Մարիաննա Գրիգորյանին ու իր ընտանիքին պաշտպանության տակ վերցնելու հարցով։ Սաքունցը նաև տեղեկացրել է, որ երեկ Մարիաննա Գրիգորյանը միայն ցուցմունք է տվել, որևէ մեկի հետ առերեսում չի եղել։
Ոստիկանության տվյալներով՝ սպանության սպառնալիքներ հնչեցնողը «Hayk Berman Ohanyan» ֆեյսբուքյան օգտատերն է։
Երեկ այս դեպքին է անդրադարձել նաև ՀՀ գլխավոր դատախազ Արթուր Դավթյանը, պնդելով, որ իր կառույցն այս ահարցում անգործության չի մատնվել։
Գլխավոր դատախազությունը «Մեդիալաբ» կայքի խմբագրին սպառնալու ահազանգից ավելի քան մեկ շաբաթ անց որոշեց քրեական գործ հարուցել՝ Քրեական օրենսգրքի 137-րդ հոդվածի հատկանիշներով՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այն իրականացնելու իրական վտանգ է եղել: Հարուցած քրգործը Գլխավոր դատախազությունը ուղարկել էր Քննչական կոմիտե:
Պաշտպանության նախարարի ծաղրանկարի հրապարակումից հետո կայքի խմբագիր Մարիաննա Գրիգորյանին «Ֆեյսբուքի» մի օգտատեր շարունակ սպառնացել է՝ հիշեցնելով ֆրանսիական երգիծական պարբերականի՝ «Շարլի Էբդոյի» հետ տեղի ունեցածը, երբ խմբագրության վրա հարձակման հետևանքով 12 մարդ էր զոհվել, զրույցներում հիշատակելով է նաև լրագրողի մանկահասակ դստեր անունը։
