Շիրակի մարզի Հայկավան գյուղը արևմուտքում սահմանակից է ժամանակակից Թուրքիային, ինչպես նաև մարզի Առափի, Ոսկեհասկ, Ողջի համայնքներին:
Գտնվում է ծովի մակերևույթից մոտ 1600 մետր բարձրության, մարզկենտրոն Գյումրիից 12, մայրաքաղաք Երևանից՝ 130 կմ հեռավորության վրա:
Մինչև 1945 թվականի դեկտեմբերի 7-ը Հայկավանը կրել է Բաջօղլի անունը:
20-րդ դարի նշանավոր հայ ազգագրագիր Զավեն Կորկոտյանի գրքում Հայկավանի, այն ժամանակ՝ Բաջօղլուի մասին, նշվում է 1886-ի մարդահամարում, իսկ դրան նախորդող՝ 1873-ի մարդահամարում չի նշվում, ինչից կարելի է ենթադրել, որ այստեղ բնակչություն է հաստատվել 1873-ից հետո կամ բնակիչները վերադարձել են այդ թվականից հետո, եթե Բաջօղլին ավերված բնակավայրերից է եղել:
Կորկոտյանի մոտ ազգային դասակարգումն այսպիսին է՝ հայ, իսլամ/թաթար/թրքո-թաթար, այլ:
Հայկավանի բնակչությունը (աղբյուրը՝ Զավեն Կորկոտյան, “Խորհրդային Հայաստանի բնակչությունը վերջին հարյուրամյակում (1831-1931)”, ըստ տարիների, եղել է հետևյալը.
1886 թվական – 391 հոգի, բոլորը՝ այլ
1897 թվական – 543 հոգի (համառուսական՝ ցարական մարդահամար), բոլորը՝ իսլամ, հիմնականում՝ կարափափախ
1904 թվական – 600 հոգի
1914 թվական – 698 հոգի, հիմնականում՝ կարափափախ, ըստ Կովկասյան օրացույցի
1919 թվական – 586 հոգի, հիմնականում՝ թուրքեր
1922 թվական – 1022 հոգի, որից 999-ը՝ հայ, 23-ը՝ թրքո-թաթար
1926 թվական – 1042 հոգի (ԽՍՀՄ առաջին մարդահամար), որից 1014-ը՝ հայ, 28-ը՝ պարսիկ
1931 թվական – 1291 հոգի, բոլորը՝ հայ:
Խորհրդային տարիների մարդահամարների տվյալներով Հայկավանն ունեցել է.
1939 թվական – 1353 հոգի,
1959 թվական – 1398 հոգի,
1970 թվական – 1410 հոգի,
1979 թվական – 1348 հոգի,
1989 թվական – 1482 հոգի:
Ախուրյանի շրջանը (մինչև 1945-ը՝ Դուզքենդի շրջան), կազմավորվել է 1937 թվականի դեկտեմբերի 31-ին, տարածությունը՝ 576 քառ. կմ։
Ախուրյանի շրջանի վարչական կենտրոնը Ախուրյան գյուղն էր։ Շրջանն ուներ հետևյալ բնակավայրերը.
- Ազատան
- Ախուրիկ
- Ախուրյան ե/գ կայարանին կից ավան
- Այգաբաց
- Առափի
- Արևիկ
- Բայանդուր
- Բենիամին
- Գետք
- Երազգավորս
- Լեռնուտ
- Կամո
- Կապս
- Կառնուտ
- Կարմրաքար
- Կրաշեն
- Հայկավան
- Հացիկ
- Հովիտ
- Հովունի
- Ղարիբջանյան
- Մայիսյան
- Մայիսյան ե/գ կայարանին կից ավան
- Մարմաշեն
- Մեծ Սարիար
- Մուսայելյան, այսօր՝ Բասեն
- Շիրակ
- Ոսկեհասկ
- Ջաջուռ
- Ջաջուռ ե/գ կայարանին կից ավան
- Ջրառատ
- Վահրամաբերդ
- Փոքրաշեն
- Քեթի
