Երբ ՀՀ վարչապետ Նիկոլ Փաշինյանը հայտարարում է, ավելի ճիշտ կեղծում է, թե իբր ՀՀ նախկին բոլոր նախագահները ճանաչել են Ադրբեջանի տարածքային ամբողջականությունը, ՀՀ երկրորդ և երրորդ նախագահներ Ռոբերտ Քոչարյանի ու Սերժ Սարգսյանի շրջապատը շատ կոշտ են արձագանքում, որ Փաշինյանը մանիպուլացնում է, ավելին՝ ասում են՝ մենք Փաշինյանին 42 հազար քառակուսի կմ տարածքով երկիր ենք փոխանցել:
Առաջին. այդ Դուք չեք փոխանցել, այն Դուք զավթել եք 1998թ ռազմապետական հանցավոր հեղաշրջման և 3-4 կեղծված ընտրությունների ճանապարհով՝ Հայաստանի ժողովրդից:
Երկրորդ. Ձեր հոգին շատ նուրբ է և շատ եք նեղվում, որ Փաշինյանը մանիպուլացնում է: Իսկ Դուք ինչո՞ւ եք երկու տասնամյակ մոլորեցրել Հայաստանի բնակչությանը, որ իբր առաջին նախագահ Լևոն Տեր-Պետրոսյանը Արցախը ուզում էր հանձնել ու Դուք եկաք փրկեցիք՝ մի օր Լիսաբոնն էիք հիշեցնում, մի օր՝ 1997թ սեպտեմբերյան ասուլիսն ու նոյեմբերյան հայտնի հոդվածը:
Արցախը Ադրբեջանին հանձնողը պիտի սիրով տեղի տար Ռուսաստանի, ԱՄՆ-ի և Ֆրանսիայի նախագահներ Բորիս Ելցինի, Բիլ Քլինթոնի ու Ժակ Շիրակի, ԵԱՀԿ 54 պետությունների Լիսաբոնի 1996թ դեկտեմբերյան գագաթաժողովի ճնշումներին, որոնք գրավոր տեքստ ընդունեցին, որ Լեռնային Ղարաբաղը ամենալայն ինքնավարությամբ Ադրբեջանի կազմում է:
Լևոն Տեր-Պետրոսյանը վետո դրեց: 5 տարվա անկախություն ունեցող երկիրը վետո դրեց և ոչ ասաց Ելցինին, Քլինթոնին, Շիրակին ու ԵԱՀԿ-ին:
Հասկանում ե՞ք, ինչ է տեղի ունեցել:
Թաթուլ Հակոբյան
25 մայիս, 2023թ, ԱՆԻ կենտրոն
