ՀԱՅ ԱՆԿԱԽՈՒԹԵԱՆ ՏԱՐԵԴԱՐՁԸ.- Հայկական անկախության չորրորդ տարեդարձին առթիւ Բերայի [Պոլիս] Ս. Երրորդութիւն եկեղեցիին մէջ պատարագեր է Տ. Մեսրոպ Եպիսկոպոս Նարոյեան եւ քարոզով մը բացատրեր է անկախութեան տարեդարձին նշանակութիւնը:
Պատարագէն վերջ հոգեհանգիստ կատարուեր է անկախութեան համար իյնող նահատակաց յիշատակին:
Ապա Հայ Հանրապետութեան առաջին վարչապետ Պ. Յովհաննէս Քաջազնունի բանախօսեր է եկեղեցիին դասէն, պատմականն ընելով հանրապետութեան կազմութենէն մինչեւ այսօր պատահած անցքերուն:
Ալեզարդ նախկին վարչապետը եզրակացուցեր է իր խօսքը հրաւիրելով ժողովուրդը չի մոռնալ մայիս 28-ի պատմական թուականը եւ չյուսալքուիլ պատահական անցքերէ քանի որ կայ ու կը մնայ Հայ Հանրապետութիւնը ինչ որ ալ ըլլայ անոր վարչական ձեւը ներկային կամ ապագային մէջ:
ՀԱՅԱՍՏԱՆԻ ԿՈՉՆԱԿ, թիւ 26, 1922թ
