2017թ. հոկտեմբերի 24-ին Դովեղում նշվել է գյուղի տոնը:
1984թ. հոկտեմբերի 24-ին ՀԽՍՀ Մինիստրների խորհրդի նախագահի առաջին տեղակալ Վլադիմիր Մովսիսյանը սահմանամերձ Դովեղի սահմանագոտի էր ժամանել Ադրբեջանի հետ սահմանները գծելու հետ աշխատանքները կատարելու համար: Սակայն Մովսիսյանին և Դովեղի ղեկավարներին սահմանամերձ անտառից ադրբեջանական խաժամուժը մահվան սպառնալիքով տարել է Ղազախի շրջանի Քամառլու գյուղ, ստիպել, որպեսզի նրանք ստորագրեն Դովեղի սահմանագոտու ավելի քան 1800 հեկտար տարածքն Ադրբեջանին պատկանելու փաստաթղթի տակ, սակայն Մովսիսյանը չի ընկրկել ադրբեջանցիների սպառնալիքների տակ:
Արդյունքում Դովեղի սահմանին կատարված սահմանագծման աշխատանքների արդյունքում Դովեղին է վերադարձվել 1800 հեկտար, իսկ ընդհանուր առմամբ Հայաստանին՝ ավելի քան 14 հազար հեկտար տարածք:
Գյուղի վարչական ղեկավար Սամվել Գորգինյանը նշեց, որ արդեն երկրորդ անգամ է նշվում գյուղի տոնը, հաջորդ անգամ այն ավելի շուքով կնշվի:
Դովեղի տոնը նշելու համար ժամանել էին խոշորացված Նոյեմբերյան համայնքի ղեկավար Կարեն Աբազյանը, Վլադիմիր Մովսիսյանի որդի Վարդան Մովսիսյանը, այլք:
Գյուղի նախկին ղեկավար, Հայաստանի գյուղատնտեսական ակադեմիայի ամբիոնի վարիչ Հայկ Ղազարյանը նշեց, որ դովեղցիները դեռեւս 1960-ական թվականների վերջերին տարիներին պայքարում էին իրենց հողերը Ադրբեջանից վերադարձնելու համար:
Գյուղի կենտրոնում ազգային, հայրենասիրական ոգով գեղարվեստական գեղեցիկ ծրագիր ցուցադրվեց: Տոնական միջոցառման ավարտին Ադրբեջանի սահմանագոտում տոնական հրավառություն կայացավ:
Ոսկան Սարգսյան
