Ջորջիայից՝ Նոյեմբերյան. Յակուբյան ընտանիքի օգնությունը բռնի տեղահանված արցախցի ընտանիքներին

Մի քանի օր առաջ ֆեյսբուքի մեսինջերով նամակ ստացա Գրեյս Յակուբյան Վայգներից (Grace Yacoubian Wiegner):

Գրեյսը գրում էր, որ գնահատում է իմ լրագրողական աշխատանքը (I have heard good things about you and have very much appreciated your reporting and enjoyed your pictures on Artsakh and Armenia), որ մենք ունենք մի քանի ընդհանուր ընկերներ, ներառյալ Նարեկ Սեֆերյանը:

Գրեյսը հարցնում էր, թե ինչպես կարող է Յակուբյան ընտանիքի կողմից հանգանակված գումարը օգտագործել Հայաստանում, մասնավորապես՝ սահմանային, գյուղական հատվածում հաստատված, բռնի տեղահանված արցախահայ կարիքավոր ընտանիքներին օգնելու հարցում:

Որոշակի տեղեկատվություն փոխանցեցի Գրեյսին, ինչպես նաև նրան ուղարկեցի իմ և Հայկ Բարսեղյանի պատրաստած ֆիլմը (Հույսի հորիզոններ, www.youtube.com/watch?v=xftyOaDvQNM), որը պատմում է այն ընտանիքների մասին, ովքեր հաստատվել են հայ-ադրբեջանական սահմանի Նոյեմբերյանի և Բերդի հատվածում և որոնց մեծ օգնություն են ցույց տվել Ֆրեզնոյի հայերը:

Մի քանի օր անց Գրեյսը զանգեց, խոսեցինք, ծանոթացանք, պատմեցի իմ մասին, ինքը՝ իր մասին: Նրա հայրը Երուսաղեմից է, մայրը՝ ամերիկացի: Ասաց, որ հայերեն այնքան էլ լավ չի խոսում, Հայաստան է եկել 2019-ին, այցելել է Արցախ:

Հաջորդ օրը նա ուղարկեց 1.300 դոլար, որով պատրաստեցի 26 փաթեթներ՝ առաջին անհրաժեշտության սնունդ հետևյալ չորս բնակավայրերում հաստատված արցախցիների համար՝ Նոյեմբերյան (13 ընտանիք), Բերդավան (9 ընտանիք), Ջուջևան (3 ընտանիք), Դովեղ (1 ընտանիք):

Երեկ և այսօր այդ փաթեթները փոխանցեցի այդ ընտանիքներին: Արցախցիներին ասացի, որ ձեզ օգնել է Ամերիկայի Ջորջիա նահանգից Յակուբյան ընտանիքը:

Նրանք շնորհակալություն հայտնեցին և խնդրեցին, որ փոխանցեմ Գրեյսին, ինչը անում եմ:

Ես նաև ուրախ եմ, որ Ամերիկայի իմ հարյուրավոր ընկերների շարքում ունեցա նոր ընկեր ու նոր հասցե՝ Grace Yacoubian Wiegner, Georgia, USA:

Շնորհակալություն, Գրեյս:

Թաթուլ Հակոբյան

26-ը հունիսի, 2026թ, Դովեղ