Եթե գարնանը Ադրբեջանը չհարձակվի, «մեր առաքելությունն արդեն հաջողված է», Հայաստանում ԵՄ դիտորդական առաքելության ղեկավարի այս հայտարարությունը Բաքվում մեծ դժգոհություն է առաջացրել, հաղորդում է Ազատությունը։
Անցած հոկտեմբերից կարճաժամկետ, իսկ այս փետրվարից արդեն երկարաժամկետ՝ երկու տարով Հայաստանի սահմաններին դիտորդություն իրականացնող եվրոպացի մասնագետները մինչև այս ձեռնպահ էին մնում մեկնաբանություններից, և ահա գերմանական Դոյչե Վելեն հրապարակեց առաքելության ղեկավար Մարկուս Ռիտերի հայտարարությունը։
«Շատ հայեր կարծում են, որ Ադրբեջանի կողմից գարնանային հարձակում կլինի: Եթե դա տեղի չունենա, մեր առաքելությունն արդեն հաջողված է։ Մենք չենք կարող միջամտել, մենք ունենք միայն հեռադիտակներ ու տեսախցիկներ մեր տրամադրության տակ»,- ասել է նա։
Չնայած Եվրամիության առաքելության ղեկավարը ոչ թե անձամբ իր անունից էր խոսել, այլ հղում արել հայաստանցիներին, բայց առաքելության գործունեության երկարաձգումից դժգոհ Բաքուն շտապեց հայտարարել: «Մենք խստորեն դատապարտում ենք, որ ԵՄ քաղաքացիական առաքելության ղեկավարը, հիմնվելով հայկական կողմի կեղծ և զրպարտչական հայտարարությունների վրա, կարծիք է հայտնել, որ Ադրբեջանն իբր պատրաստվում է հարձակման»,- ասել է արտգործնախարարության խոսնակը։
