Լուսաղբյուր անունով Հայաստանում երկու գյուղ կա՝ Լոռու և Շիրակի մարզերում։
Շիրակի Լուսաղբյուր գյուղը Անիի տարածաշրջանում է, նախկինում ունեցել է Սվանվերդի անունը։ Սվանվերդիից Լուսաղբյուր է վերանվանվել 1947 թվականի փետրվարի 3-ին։
Գյուղը գտնվում է ծովի մակարդակից 1470 մ բարձրության վրա, մարզկենտրոնից 22 կմ հարավ-արևմուտք, Ախուրյան գետի ձախ ափին։
Գյուղը հիմնադրել են 1826-1829թթ-ին Արևմտյան Հայաստանի Մուշի և Բասենի գավառներից եկած հայերը:
Անի համայնքը կազմավորվել է 2017 թվականի նոյեմբերին: Համայնքի ընդհանուր բնակչությունը 21 հազարի սահմաններում է, որից ավելի քան 5000-ը՝ Մարալիկում:
Անի համայնքի կազմում Մարալիկ քաղաքից բացի ընդգրկված են հետևյալ գյուղերը՝ Աղին, Անիավան, Անիպեմզա, Բագարան (Խարկովի հետ միասին), Գուսանագյուղ, Իսահակյան, Լանջիկ, Լուսաղբյուր, Հայկաձոր, Ձիթհանքով, Ձորակապ, Շիրակավան, Ջրափի, Սառնաղբյուր, Սարակապ, Քարաբերդ:
Այս գյուղերը Խորհրդային Հայաստանի Անիի շրջանի բնակավայրերն են:
Անիի շրջանը (մինչև 1961 թվականը՝ Աղինի շրջան), կազմավորվել է 1931 թվականի դեկտեմբերի 31-ին: Տարածությունը կազմել է 429 քառ. կմ: Անիի շրջանը Հայաստանում մարզերի ձևավորումից հետո մտավ Շիրակի մարզի կազմ:
Զավեն Կորկոտյանի “Խորհրդային Հայաստանի բնակչությունը վերջին հարյուրամյակում (1831-1931)” աշխատության համաձայն, Լուսաղբյուր գյուղի բնակչությունը ըստ տարիների, եղել է հետևյալը.
1831 թվական – 255 հոգի, բոլորը՝ հայ,,
1873 թվական – 810 հոգի, բոլորը՝ հայ,
1886 թվական – 1009 հոգի, բոլորը՝ հայ,
1897 թվական – 1128 հոգի (համառուսական՝ ցարական մարդահամար), բոլորը՝ հայ,
1904 թվական – 1246 հոգի,
1914 թվական – 1269 հոգի, ըստ Կովկասյան օրացույցի
1914 թվական – 1370 հոգի, ըստ արխիվային տվյալների
1916 թվական – 1218 հոգի,
1919 թվական – 1470 հոգի,
1922 թվական – 860 հոգի, որից 859-ը՝ հայ, 1-ը՝ այլ,
1926 թվական – 693 հոգի (ԽՍՀՄ առաջին մարդահամար), որից 687-ը՝ հայ, 6-ը՝ քյուրդ,
1931 թվական – 891 հոգի, որից 890-ը՝ հայ, 1-ը՝ ռուս:
Նախախորհրդային շրջանում Անիի շրջանի գյուղերը մաս են կազմել Արթիկի շրջանի:
