Վերին Խոտանան գյուղը գտնվում է Կապանի շրջանում, մարզկենտրոնից 25 կմ հեռու, ծովի մակերևույթից ավելի քան 1300 մետր բարձրության վրա, Բարգուշատ լեռների հարավային լանջին: Ըստ մարզպետարանի տվյալների, այսօր ունի 205 բնակիչ: Հիշատակվում է 12-13-րդ դարերից, Ստեփանոս Օրբելյանի կողմից Տաթևի վանքին հարկատու գյուղերի հին ցուցակում, ըստ որի վանքին տալիս էր 12 միավորի հարկ։
Վերին Խոտանանի բնակչությունը (աղբյուրը՝ Զավեն Կորկոտյան, “Խորհրդային Հայաստանի բնակչությունը վերջին հարյուրամյակում (1831-1931)”, ըստ տարիների, եղել է հետևյալը.
1831 թվական – 34 հոգի, բոլորը՝ հայ,
1873 թվական – 226 հոգի, բոլորը՝ հայ,
1886 թվական – 446 հոգի, բոլորը՝ հայ,
1897 թվական – 511 հոգի (համառուսական՝ ցարական մարդահամար), բոլորը՝ հայ,
1904 թվական – 547 հոգի,
1914 թվական – 242 հոգի,
1919 թվական – 950 հոգի, բոլորը՝ հայ,
1922 թվական – 711 հոգի, բոլորը՝ հայ,
1926 թվական – 588 հոգի (ԽՍՀՄ առաջին մարդահամար), բոլորը՝ հայ,
1931 թվական – 766 հոգի, բոլորը՝ հայ:
Կորկոտյանի ցուցակում հանդիպում է նաև Ներքին Խոտանան գյուղը: Ըստ այդմ, գյուղն ունեցել է հետևյալ թվաքանակով բնակչություն.
1904 թվական – 112 հոգի,
1914 թվական – 244 հոգի,
1919 թվական – 93 հոգի, բոլորը՝ հայ,
1922 թվական – 137 հոգի, բոլորը՝ հայ,
1926 թվական – 149 հոգի (ԽՍՀՄ առաջին մարդահամար), որից 146-ը՝ հայ, 3-ը՝ այլ,
1931 թվական – 200 հոգի, բոլորը՝ հայ:
Կապան բազմաբնակավայր համայնքը, որի մեջ մտնում է նաև Վերին Խոտանանը, կազմավորվել է 2017 թվականի հունիսի 9-ին Կապանի տարածաշրջանի 32 համայնքների միավորման արդյունքում։ Ընդգրկում է 38 բնակավայր, որից մեկը համայնքի կենտրոն Կապան քաղաքն է, մյուս բոլորը գյուղական բնակավայրեր են։ Բնակչության ընդհանուր թիվը՝ 45.146 հոգի:
Կարդալ և դիտել նաև՝
https://www.aniarc.am/2021/02/10/kapan-region-1831-villages-list-korkotian/
