Պարսից հյուպատոսի ժամանումը
Ամսի 8-ին [1920 թվականի հունվար] Երևան ժամանեց պարսից հյուպատոս Միրզա Ասդուլլահ խան Մանի օլ Մոլքը, ով հինգ ամսից ի վեր կարևոր հանձնարարություններով բացակայում էր մայրաքաղաքից: Կայարանում նրան դիմավորեցին պատշաճ՝ իշխանության ներկայացուցիչները:
Նշանակալից է այն հանգամանքը, որ Միրզա Ասդուլլահ խան Մանի օլ Մոլքը Երևան է վերադառնում պարսիկ կառավարության կողմից Անդրկովկաս ուղարկված քաղաքական-առևտրական առաքելության առաքելության Հայաստան գալու նախօրյակին: Վերադառնում է վարձատրված իր երեքամյա փայլուն գործունեության համար թե աստիճանի բարձրացումով, թե առյուծի և արեգակի երկրորդ կարգի ադամանդազարդ շքանշանով, որ հազվագյուտ է նման պաշտոնի համար: Վերադառնում է այն ժամանակ, երբ ծրագրվում էր նրան Կ. Պոլիս գլխավոր հյուպատոս ուղարկել:
Բայց Միրզա Ասդուլլահ խան Մանի օլ Մոլքը անձնավորությունը, նրա երեքամյա պաշտոնավարությունը և պարսից կառավարության՝ նրան ցույց տված արտակարգ ուշադրությունը կասկածի տեղ չեն թողնում, որ երկու հարևան պետությունների միջև բարեկամական հարաբերությունները պիտի զարգանան և ավելի իրական արտահայտություններ պիտի ստանան:
Յառաջ, ՀՅԴ պաշտոնաթերթ, Երևան, 11 հունվարի, 1920, թիվ 8
