Խնկարկություն և մոմավառություն՝ ի հիշատակ Հովհաննես Քաջազնունու․ 15 հունվար, 2018

700

Հայկական ուսումնասիրությունների ԱՆԻ կենտրոնը տեղեկացնում է, որ 2018 թվականի հունվարի 15-ին, երկուշաբթի օրը, ժամը 13-ից 14-ը, կազմակերպում է խնկարկության և մոմավառության արարողություն՝ ի հիշատակ Հայաստանի Հանրապետության առաջին վարչապետ և ապա խորհրդարանի նախագահ Հովհաննես Քաջազնունու։

Նրանք, լինեն Հայաստանի, Արցախի և Սփյուռքի շարքային քաղաքացիներ, հասարակական, քաղաքական, կուսակցական ու պետական գործիչներ, ովքեր գնահատում են Քաջազնունուն և նրա ավանդը Հայաստանի Հանրապետության կայացման գործում, կարող են հունվարի 15-ին, ուղիղ ժամը 13-ին, մոտենալ Թոխմախի քաղաքային գերեզմանոցի դիմաց (ներքին մուտք)։

Քաջազնունին Հայաստանի Հանրապետության խորհրդանիշներից է: Նա և նրա ընտանիքը կյանքը նվիրել են Հայաստանին: Նրա որդիներից երկուսը՝ Աշոտը և Արամը, 1918 և 1920 թվերին, զոհվել են Արցախում (թուրքերի դեմ պատերազմում) և Զանգիբասարում (հայ-թաթարական բախումների ժամանակ): Նրա երրորդ որդին 1920-ի հոկտեմբերին գերի ընկավ Կարսում, երբ քեմալականները զավթեցին քաղաքը:

Քաջազնունին մահացավ 1938 թ. հունվարի 15-ին բանտային հիվանդանոցում գրիպից ու թոքաբորբից, այլապես պիտի գնդակահարվեր դեռևս 1937-ի դեկտեմբերի 5-ին ՀԽՍՀ ՆԳԺԿ Եռյակի կողմից կայացված որոշման համաձայն, որը ժամանակավորապես կանխել էր բանտային բժիշկը։

Քաջազնունու վերջին լուսանկարը

Քաջազնունու գերեզմանի տեղը հստակ հայտնի չէ: Նրա դուստրը հետագայում հուշաքար դրեց հոր համար՝ Թոխմախի քաղաքային գերեզմանատանը, որը և այսօր դարձել է Քաջազնունիների ընտանեկան գերեզմանը:

2018-ի հունվարի 15-ին լրանում է Քաջազնունու մահվան/սպանության 80-ամյակը:

2018-ի փետրվարի 14-ին լրանում է Քաջազնունու ծննդյան 150-ամյակը:

2018-ի Մայիսի 28-ը Հայաստանի Հանրապետության հիմնադրման 100-ամյակն է՝ հայոց պատմության ամենալուսավոր էջերից:

Կարդալ նաև՝

Քաջազնունիների ընտանեկան գերեզմանը՝ արդեն համեմատաբար բարեկարգ վիճակում